Musikazaleentzat asteburu oparoa izango da datorrena. Izan ere, Anari eta Zatibi taldeak izango dira zapatuan Sanagustin kulturguneko agertokian, eta igandean, berriz, Ante taldea.
Azkoitiko musikariak izango dira nagusi larunbateko emanaldietan: Anariren Giza zarata diskoaren zuzenekoaz gain, Mikel Iraeta azkoitiarrak Zatibi proiektu elektronikoa aurkeztuko du. 22:00etan hasiko dira emanaldiak, eta horietarako sarrerak salgai daude Kulturazen webgunean, hamasei euroren trukean.
Bestalde, igandean, 18:00etan, Iban Urizar Amorante musikari elgoibartarrak eta Adriano Galante musikari kataluniarrak Ante proiektua aurkeztuko dute jendaurrean. Dinamoa sormen gunean egindako egonaldiaren emaitza Sanagustingo agertokira eramango dute bi artistek.