Ados Pilotaren urteko txapelketa nagusiak, Binakakoak, Azpeitian izan du geltokia gaur. 11:30ean hasita, ligaxkako jardunaldia jokatu dute Izarraitz pilotalekuan. Hain zuzen ere, lehen mailako bi partida ikusteko aukera izan dute frontoira joan direnek. Etxeko pilotaria, Oihana Orbegozo, eta bailarako beste biak, Eneritz Arrieta azkoitiarra eta Naroa Agirre arroarra, lehian aritu dira gaurkoan, baina emoziorako tarterik ez da izan apenas kantxan.
Izan ere, bi neurketetan aise gailendu dira irabazleak. Lehen partidan, 22-12 irabazi diete Arrietak eta Galeanok Oskozi eta Agirreri; borrokatutako tanto gutxi eta huts egite gehiegi eskaini dituzte pilotariek. Bigarren partidan tiki-taka luzeagoko tantoak eskaini dituzte Ruiz Infante-Orbegozo eta Barrokal-Arrastia bikoteek, baina Barrokalek eta Arrastiak abantaika hartu dute hasieratik eta arazo handirik gabe gailendu dira azkenean (22-13).