Azpeitiko Udalak ibilgailu elektrikoen birkargarako hamar kargagailu herriko enpresen esku utziko ditu, eta espeziean emandako laguntza izango da hori. Kargagailu horiek lurreko kargatze puntu bikoitzekoek dira, 22 Kw-koa hartune bakoitzeko. Kargagailu horiek enpresek beren eremu pribatuetan instalatu beharko dituzte.
Kargagailu horietan interesa duten enpresekin bilera bat egingo du udalak datorren ostegunean, otsailaren 20an, 14:30ean hasita, Basazabal jauregiko hirugarren solairuan. Udalekoek bertan esleipenaren oinarriak azalduko eta enpresetako ordezkariek izan ditzaketen zalantzak argituko dituzte.
Udalak azaldu du, Euskal Autonomia Erkidegoko Jasangarritasun Energetikoari buruzko otsailaren 21eko 4/2019 Legearen arabera, administrazio publikoek sektore pribatuarekiko lankidetza sustatu behar dute: eraikin pribatuetan, merkataritza guneetan, industrietan eta ibilgailu asko ibiltzen diren beste guneetan karga puntuak jartzeko; eta, karga sare sendo bat sortzeko eta ibilgailu elektrikoen erabilera sustatzeko, jasangarritasun energetikoaren eta emisioen murrizketaren estrategia orokorrerako. Lege hori kontuan hartuta erabaki du udalak herriko enpresen esku jartzea hamar kargagailu.