Iñaki Iruretaren omenezko 45. Herri Krosa jokatu zuten atzo, igandez, Zestoan, 180 bat lasterkarik. Helduetan, proba luzea (8,5 kilometrokoa) eta motza (2,6 kilometrokoa) jokatu zituzten parte hartzaileek, eta emakumeetan azpeitiarrak izan ziren nagusi bi probetan. Lasterketa luzea Eneritz Aramendik irabazi zuen, eta motza, berriz, Naiara Tenak.
Aramendik 0:34:13 denboran osatu zuen ibilbide luzea, eta Tenak 0:10:51 denboran ibilbide motza. Lasterketa laburrean, emakumeetan bigarrena ere azpeitiarra izan zen; Tenaren atzetik helmugaratu zen Ane Arregi (0:11:30).
Gizonetan, lasterketa luzea Amets Aranberri zestoarrak irabazi zuen, eta motza Adrian Pajares lazkaotarrak.