Sukaldeko eta garbiketako langileen lan hitzarmena berritzeko akordioa lortu eta haiei zuzendutako lanuzteak bertan behera utzi zituzten atzo bertan sindikatuek, baina hezkuntza publikoko irakasleentzako deialdiari eutsi diote martxoaren 25erako, 26rako eta 27rako nahiz apirilaren 1erako eta 2rako.
Urtarrilean eta otsailean egindako lanuzteei jarraipena emanez, datorren astean hiru egunetan (asteartean, asteazkenean eta ostegunean) eta hurrengoan beste bitan (asteartean eta asteazkenean) grebara deitu dituzte Steilas, LAB, ELA eta CCOO sindikatuek hezkuntza publikoan lanean diharduten irakasleak. Deialdi horri babesa adierazteko, eta aurreko astean egin bezala, elkarretaratzea egin zuten atzo Azpeitiko Ikastola Karmelo Etxegaraiko LHko eraikineko jolastokian. Hezkuntza publikoaren kalitatearen alde! Hemen eta orain erabakita leloak zituen pankartaren atzean elkartu zen langile, guraso eta ikasle talde bat.