Virginia Garcia astronomoak eklipseei buruzko solasaldia eskaini zuen atzo arratsaldean Ekoetxean, Aranzadik argitaratu duen Eklipseak liburuaren aurkezpena aitzakia hartuta. Zientzia elkartearen astronomiari buruzko bildumako lehena da Eklipseak, Garciak berak idatzi du eta Irrimarrako kide Karmele Gorroño ilustratzaileak jantzi.
Eklipseak zer diren azaltzeko haurrentzako liburua da Eklipseak, eta une aproposean ikusi du argia, datozen bost urteetan hamahiru eklipse ikusteko aukera izango baita. Aurrena hil honetan bertan izango da, eta . "ikusgarriena" 2026ko abuztuaren 12an, Garciaren beraren hitzetan. "Egun horretan eguzki eklipse oso bat izango dugu Euskal Herrian. Zoragarria izango da. Nik bizitza osoa daramat une horren zain. Hiruzpalau minutu iraungo du; Ilargia Lurraren eta Eguzkiaren artean jarriko da tarte horretan".
Liburu txikia da Aranzadiren astronomiari buruzko lehena, baina eklipseen sekretu guztiak daude bertan. "Zergatik gertatzen diren azaltzen dugu, prozesu korapilatsu hori modu erraz batean azalduta". Bukaeran, hurrengo eklipseak noiz izango diren zehazten da.