Emaitza kontrajarriak batu dituzte azken asteburuan Lagun Onak futbol klubaren ordezkari nagusiek. Emakumeek, bolada onari jarraipena emanez, hiru puntu bikain ekarri zituzten Goierri Gorri gogorraren zelaitik (1-2). Gizonek, aldiz, Aretxabaleta (UDA) aurkari zuzena hartu zuten atzo Garmendipen, eta Debagoienera ihes egin zuten hiru puntuek (0-2).
Partida eskasa jokatu zuen atzo Espainiako Hirugarren Mailako taldeak, eta meritu asko egin beharrik gabe lortu zuten garaipena bisitariek. Baloiaren jabe izanez ekin zion neurketari Jose Luis Riberak gidatzen duen taleak, baina jabetza hori erabat antzua izan zen. Lagun Onakek ez zuen batere minik egiten goian, eta UDAkoak lasai zeuden atzean, etxekoen huts egiteei etekina ateratzeko pronto. Hala ere, Unaxek izan zuen lehen gol aukera, baina jaurtiketa gurutzatua gutxigatik kanpora joan zitzaion. Neurketaren dinamika besteratzeko aukera izan zuen, beraz, Lagun Onakek, baina ez zuen baliatu, eta bai garesti ordaindu ere. Aretxabaletakoek bigarren zatian egin zituzten beren bi golak, eta Azpeitikoek ez zuten erreakziorako gaitasunik erakutsi.
Aurreko astean San Viatorren zelaian nagusitu ondoren irabazitako arnasak ez dio asko iraun Lagun Onaki. 39 punturekin, bederatzigarrena da Riberaren taldea sailkapenean eta zazpi puntura ditu igoerako play-off-a jokatzeko aukera ematen duten postuak. Datorren zapatuan, 29. jardunaldiaren barruan, Leioan jokatuko dute Azpeitikoek, bigarren postuan dagoen taldearen zelaian.
Urrezko beste hiru puntu
Gizonena erakusten ari ez den indarrarekin dabil azken asteetan Lagun Onaken emakumeen talde nagusia. Azken jardunaldi honetan goiko postuetako borroka estuan murgilduta dabilen Goierri Gorriri egin diote bisita Miren Arrondoren neskek, eta emaitza iraulita eta ezustekoa emanez, urresko beste hiru puntu batu dituzte.
Lehen zatian, hasieran lanak izan zituen Lagun Onakek etxeko taldearen ekinari eusteko, baina lortu zuen atzean sendo egonkortzea, eta golik gabe iritsi zen neurketa atsedenaldira. Okerragoa izan zen Azpeitikoentzat bigarren zatiaren hasiera, aldagelatik zelaira itzuli eta berehala egin baitzuten gola etxekoek. 1-0ekoaren ondoren minutu txarrak pasatu zituen Lagun Onakek, baina laster berreskuratu zituen indarrak, eta kikildu gabe, berdinketaren bila ekin zion. Eta, segituan ez, baina iritsi zitzaion saria Arrondoren taldeari. Banakoa 78. minutuan egin zuen Joane Kortak, korner batean. Eta 85.ean, talde nagusiarekin debutatu eta berehala, garaipenaren gola egin zuen Amane Iglesiasek.
Aurkari zailaren etxean irabaztearen pozarekin batera, sailkapenean postu bat irabaztea ere lortu du Lagun Onakek Gipuzkoako Ohorezko Erregional Mailaren 25. jardunaldian: orain zazpigarrenak dira, 42 punturekin. Datorren asteburuan, berriz, Intxaurdi liderra hartuko dute Azpeitikoek Garmendipen.