Urola bailarako Udaberriko Argazki Rallyaren XLVI. edizioa egingo dute igandean, apirilaren 6an, herrian. Azpeitiko Argazki Elkarteak hainbat gai proposatuko dizkie parte hartzaileei, eta horiek askotariko argazkiak aurkeztu ahal izango dituzte.
Rallyaren bukaeran, gehienez, 36 argazki aurkezteko aukera izango dute argazkilariek, kontroleko argazkiak barne hartuta. Dena den, argazkiak ezabatzeko aukera izango dute; ez, ordea, manipulatzekoa. Halaber, ordenagailuaren erabilera debekatuta dagoela gogorarazi du Argazki Elkarteak, eta gogorarazi du epaimahaiak irudien berezkotasuna, sormena eta teknika hartuko dituela kontuan erabakia hartzerakoan.
Kamera digitala eta memoria txartela dituzten herritar guztiek parte hartu ahal izango du rallyan. Igandean bertan eman beharko dute horiek izena, 09:00etatik 09:30era bitartean, Azpeitiko Argazki Elkartearen egoitzan, Dinamoa sormen gunean. Rallyaren bukaeran leku horretan bertan hustu beharko dituzte argazki txartelak, 13:00etatik 14:00etara bitartean.
Behin rallya bukatuta, partaideek gai bakoitzeko argazki bat aukeratu beharko dute, eta horiek apirilaren 10a baino lehen bidali beharko dituzte elkartearen argazkiakaae@gmail.com helbidera, partaidearen zenbakia eta aukeratutako argazkien zenbakia zehaztuta. Irudi guztiak JPG formatuan aurkeztu beharko dituzte.
Hainbat sari
Argazki rallya eginda, hainbat sari banatuko ditu Azpeitiko Argazki Elkarteak. Bilduma onenaren egileak 150 euroko saria eta Azpeitiko eskudela jasoko ditu; bigarren bilduma onena osatzen duenak 120 euro eta garaikurra; eta hirugarren bilduma onena egiten duen argazkilariak, berriz, 90 euro eta garaikurra. Lehen hiru postu horietatik kanpo sailkatzen den lehen herritarrak 70 euro eta garaikurra irabaziko ditu, eta rallyko argazki onenaren egileak, berriz, 50 euro eta garaikurra.
Epaimahaiak irabazleen berri eman eta gero, rallyan saritutako argazki guztien emanaldia eskainiko dute Azpeitiko Argazki Elkarteak Dinamoa sormen gunean duen egoitzan. Apirilaren 24an, ostegunez, izango da, 21:00etan hasita.
Saritutako argazkiak antolatzaileen esku geratuko dira, eta egoki irudituz gero, horiek erabiltzeko eskubidea izango du Azpeitiko Argazki Elkarteak, beti ere egilearen izena aipatuta.