Xoxoteko igoeran parte hartzeko izena eman daiteke gaurtik aurrera

Maddi Txintxurreta 2025ko api. 4a, 09:13

Xoxoteko igoeraren iazko edizioaren irudia. (Ihintza Elustondo)

Apirilaren 12an, Gazte Egunean, izango da Xoxoteko igoera, eta antolatzaileek izena emateko postua jarriko dute plazan hiru egunetan: gaur, apirilaren 10ean eta hilaren 11an.

Azpeitiko Gaztetxeak antolatzen duen Gazte Astearen baitan, ekimen garrantzitsuenetakoa da Gazte Egunean egiten den Xoxoteko igoera. Apirilaren 12an izango da, 10:00etan hasita, eta izena emateko postua jarriko dute antolatzaileek hiru egunetan: gaur, apirilaren 10ean eta hilaren 11an, 18:00etatik 20:00etara.

Horrez gain, Haginpe tabernan jarriko duten zerrendan izena emateko aukera ere izango da. 5 euro ordaindu beharko ditu Xoxoteko igoeran parte hartu nahi duenak eta, dortsalaz gain, lasterketako asegurua eta hamaiketakoa ere sartuko da prezio horretan.

Lasterketa motza baina gogorra da Gazte Egunekoa, 4 kilometro eta 900 metroko desnibela baititu. Egunean bertan, 09:00etatik 09:50era bitartean banatuko dira dortsalak, Azpeitiko plazan. 10:00etan hasiko da Xoxoteko igoera, plazako kioskoaren paretik.

Iaz, 53 pertsonak hartu zuten parte Gazte Eguneko lasterketan, eta Ibai Angulo eta Hiart Alberdi nagusitu ziren.

Azpeitia Gukak zu bezalako irakurleen babesa behar du tokiko informazioa euskaraz eta modu profesionalean lantzen jarraitzeko.


Izan Gukakide