Atzo iluntzean Gipuzkoako Eskolarteko Bertsolari Txapelketaren finala jokatu zuten Azpeitiko Azoka Plazan. Imanol Artola Felix gai jartzaile zela, zortzi lagun aritu ziren nor baino nor oholtzaren gainean; horietatik hiru eskualdekoak: Suhar Gesalaga eta Joanes Azpillaga azpeitiarrak eta Adei Urbitarte zarauztarra. Hiruretako inork ez zuen txapela janzterik lortu, epaimahaiak ebatzi baitzuen Egiar Otegi oiartzuarra izan zela saioko onena; baina txapeldunorde bai, Gesalaga gelditu zen.
Finaleko saioaren aurretik, giroa berotzea aldera, bertsozaleek afaria egin zuten Azoka Plazan bertan, eta gazte eta heldu, dozenaka izan ziren han bertan afaltzeko hautua egin zutenak. Bertso saioari, berriz, 22:30ak aldera ekin zioten, eta jendaurrean aritzeak sortzen duen urduritasuna urduritasun, ale politak utzi zituzten oholtza gainean kantari aritu ziren zortzi bertsolariek.