Eguraldia lagun, kirola, inklusioa, aldarrikapena eta festa uztartuta Trail Martxa Urdina egin dute gaur goizean dozenaka lagunek Azpeitian. Egun Urdinaren barruan, Xaguxatar bidean 4,5 kilometroko ibilbidea osatu dute eskola kirolean aritzen diren haurrek nahiz aniztasun funtzionala dutenek, hainbat gurasok nahiz boluntariok lagunduta.
10:00etan abiatu dira partaideak plazatik, eta 11:45erako plazan ziren berriro denak, eguzkiaren epelean ibilbidea osatuta. Indarrak hartzeko aukera izan dute herritarrek plazara iristean; izan ere, jan-edana prest zuten hara heldu direnerako Domusa Teknik 40 MLKen antolatzaileek eta Marea Urdinako kideek.
Aurreko urteetan Domusa Teknik 40 MLK probaren egunean egin izan zuten Trail Martxa Urdina, baina aurten dataz aldatzea erabaki dute, ekitaldi denak egun berean egitea "gehitxo" zela ikusi zutelako. Horrenbestez, gaur egin dute martxa, Egun Urdinaren barruan. Dena den, ez da goizekoa izan ekitaldi bakarra; arratsaldean, 17:00etan, Marea Urdina-Izarraitz II. Igeriketa Txapelketa izango da igerilekuan, eta gero, 19:00etan, Domusa Teknik 40 MLKeko boluntarioen ekitaldia-eta egingo dituzte Sanagustin kulturgunean. Hara joaten direnek zozketez, mokadutxoaz eta Oihan Vega disko jartzailearen emanaldiaz gozatu ahal izango dute.
Hona hemen arratsaldeko egitaraua:
- 17:00. Marea Urdina-Izarraitz II. Igeriketa Txapelketa, Udal Igerilekuan.
- 18:00-20:00. Boluntarioen kamiseten banaketa, Sanagustin kulturgunean.
- 19:00. Boluntarioen ekitaldia eta zozketak, Sanagustin kulturgunean.
- 20:00. Mokadutxoa boluntarioentzako.
- 20:30-22:30. Oihan Vega DJa.
(Argazkiak: Julene Frantzesena eta Haritz Orbegozo)