Martin Arrantzalea (alcedo atthis) hegaztia babesteko itxitura egiteko lanak hasi ditu Azpeitiko Udalak Loiolako Inazio etorbidean, Urola ibaiaren ondoan egokituta dagoen pasealekuan. Eremu hori, beraz, itxita izango da gaur eta bihar, hesolak jartzen hasi direlako, eta hala egongo da lanak bukatu bitartean.
EAEko Espezie Mehatxatuen Katalogoan sartuta dago interes bereziko espezietzat jotzen den Martin Arrantzalea. Ohikoa da Urola ibaian ikustea, eta, ondorioz, ingurua babesteko hautua egin du udalak.
Ibaiaren ondoan, Loiolako Inazio etorbidean kokatuta dagoen pasealekua aisialdirako eremu bilakatu denez, eta jendeak han paseoan-eta ibiltzeko ohitura hartu duenez, itxitura egitea erabaki du erakundeak, ibaiko fauna babesteko.