Euskadiko Musikari Gazteen Lehiaketan bigarren sari bat jaso du Denis Arzallus piano jotzaile azpeitiarrak. Martxoaren 29an eta 30ean egin zuten lehiaketaren XVIII. edizioa Gasteizko Jesus Guridi kontserbatorioan, eta tekla modalitateko B kategorian irabazi zuen saria Arzallusek, beste partaide batekin batera.
Arzallusek hamar-hamabost minutuko emanaldia eskaini zuen, eta Bachen, Mozarten nahiz Poulenc-en obrak interpretatu zituen. Joan zen ostiralean eskuratu zuen saria azpeitiarrak, Gasteizko kontserbatorioan egin zuten ekitaldian. Sari hori tarteko, piano saio bat jasoko du Arzallusek Musikenen.
Lehiaketako epaimahaia Marta Zabaletak, Ainhoa Barredok eta Cristina Lucio-Villegasek osatu zuten, eta aurtengo edizioko parte hartzaileek erakutsitako maila altua goraipatu zuten.