Gipuzkoako Foru Aldundiko Lurralde Oreka Berdeko sailak eta HAZI fundazioak Etorkizuna bermatuz: belaunaldi arteko erreleboa nekazal sektorean prestakuntza programa jarri dute martxan, eta horren nondik norakoak azaltzeko bilera informatiboa egingo dute ostegunean Azpeitian.
16:00etatik 18:00etara gauzatuko dute bilera, Urola Erdiko Mankomunitatearen egoitzan (Azoka Plazan). Programaren gaineko xehetasunak azalduko dizkiete lehen sektorean aritzen diren herritarrei, eta prestakuntza ibilbideari buruzko informazioa ere jaso ahal izango dute horiek. Bileran parte hartu nahi dutenek 943-11 21 73 telefono zenbakira deitu edo lurraldeoreka@gipuzkoa.eus helbidera mezua idatzi beharko dute.
Programaren helburu nagusia da erretirorako adina gerturatzen ari zaien nekazariei prestakuntza integrala eskaintzea, etorkizuneko zalantzak argitzea eta prozesua erraztea. Udazkenean hasiko dute formakuntza ibilbidea, baina aurretik informazioa emateko bilerak egingo dituzte Gipuzkoako hainbat eskualdetan. Azpeitian ez ezik, Hernanin, Tolosan, Elgoibarren eta Ordizian ere egingo dituzte bilerak.