Atzo hasi zen Euskal Herriko Itzulia Gasteizen, eta larunbatera bitartean sei etapa egin beharko dituzte txirrindulariek. Bihar, asteazkena, Gipuzkoako errepideetan barrena egingo dute Zarautz-Beasain Itzuliko hirugarren etapa, eta Azpeitiko lurretatik ere igaroko da.
13:30ean irtengo dute txirrindulariek Zarauztik, eta 156,6 kilometroko distantzia eta zazpi mendate (Meaga, Andazarrate, Alkiza, Santa Ageda, Mandubia, Gaintza eta Lazkaomendi) izango dituzte aurretik. Azpeitiko lurretara Beizamatik (15:22 aldera) barrena iritsiko dira txirrindulariak. Nuarben 15:30 aldera izango dira eta handik Matxinbentatik (15:38) Mandubiko mendatera joango dira.
Itzulia igaroko den errepideak trafikoarentzako ordu erdi lehenagotik itxiko dituzte.
