Latxa arrazarekin lan egiten duten artzainek eta gaztagileek egun handia izan zuten atzo Ordizian (Gipuzkoa). Artzain Eguna ospatu zuten han, eta ekitaldi ugariren artean, latxa aharien, bildotsen eta ardien erakusketa-lehiaketak egin zituzten Garagartza plazan.
Hogei bat artzainen 200 abelburu inguru elkartu ziren erakusketan. Horien artean zeuden, lehen aldiz, Azpeitiko Premietxeberri baserriko artaldekoak, eta bi sarirekin itzuli ziren etxera: bildots errape onenarena eta arkume ahari onenarena, biak latxa muturgorrien sarien sailean.