Zumaian dituen hiru lantegietan 24 langile kaleratzeko prozesua hasi zuen apiril hasieran Sarralle taldeak. Enpresa horietako bat Auxi mekanizatu tailerra; abian den lana erregulatzeko txostenak (LET) aurrera egiten badu, Auxiko hamalau langileetatik hamar kaleratuko dituzte. Herenegun egin zuten bilera langileen ordezkariek eta zuzendaritzak, baina akordiorik gabe bukatu zen, eta Auxiko langileek grebara jotzea erabaki dute.
Hain zuzen ere, gaur dute lehen greba eguna. Goizean Zumaian egin dituzte protestak, eta eguerdian dozena bat langile Azpeitian izan dira: 12:00etatik 13:00etara Sarralleren egoitza nagusiko atarian egon dira, txilibituak joz eta aldarrikapenak ozen zabalduz; eta ondoren Landetako biribilgunera eraman dute protesta, Auxi ERErik ez, Sarralle erantzule zioten ELAk sinatutako pankartekin.
Auxiko langileak Landetako biribilgunean. (Mailo Oiarzabal)