Apirilaren hasieran aurkeztu zuten Azpeitiko Zaintza Mahaia, herriko zaintzen ereduaren eraldaketaren alde lan egitea helburu duen egitasmoa. Bada, diagnostiko bat osatzea izango da erakunde horren lehen urratsa, eta horretarako, galdetegiak bidali zituen herriko etxe guztietara. Ostiral honetan amaituko da horiek betetzeko epea.
Norbaitek galdetegia jaso ez baldin badu, Gizarte Zerbitzuetan eska dezake, edo internet bidez bete, esteka honetan. Halaber, herriko hainbat puntutan jarri dituzten ontzietan aurkeztu behar da dokumentua: herriko bost botiketan, udaletxean, Azpeitiko eta Urrestillako anbulatorioetan, Gizarte Zerbitzuen egoitzan, San Martin egoitzan, igerilekuan eta Elikagunean.
"Diagnostiko egoki bat egiteko eta zaintzaren inguruan azpeitiarrek dituzten premia, kezka eta abarrak ezagutzeko, garrantzitsua da ahalik eta jende gehienak erantzutea (adin guztietakoek)", adierazi du Udalak ohar bidez.