Atzo hasi zuen Azpeitiak larruzko paletako eta pala motzeko Gipuzkoako Herriarteko Txapelketan aurtengo ibilbidea, Deban, eta Ilunpeko erreminta saileko ordezkariek ezin izan zioten lehiari emaitza onarekin ekin.
Izan ere, final laurdenetako kanporaketaren joanekoan jokatutako bi partidak galdu zituzten Azpeitiko palistek: larruzko paletan, Debako Badiolak eta Etxeberriak 35-27 irabazi zieten Asier Egiguren Bikutze-ri eta Mikel Sanchezi; eta pala motzean, 40-26 hartu zituzten mendean Lopezek eta Prietok Urtzi Lopetegi eta Eneko Martija.
Ez dute erraz izango Azpeitiko ordezkariek finalaurrekoetara iristea, baina itzulerako partidak aurretik dituzte, horretan saiatzeko. Hain zuzen ere, aste honetan jokatuko dituzte horiek; eguna eta ordua baieztatzeko zain, Betharrameko pilotalekuan ariko dira palistak.