Maiatzaren 18an, igandean, Museoen Nazioarteko Eguna ospatuko dute Azpeitiko Burdinbidearen Euskal Museoan tren historikoen zirkulazio bereziak eta erakustaldiak antolatuta.
Lurrun tren historikoek museoaren eta Lasaoko geltokiaren arteko joan-etorria egingo dute 11:00etan, 12:00etan eta 13:00etan. 11:00etako joan-etorria Vasco-Asturiana konpainiaren Alsthom 1004 diesel tren makinarekin egingo dute, Tarben (Okzitania) eraikia da 1965ean. 12:00etan eta 13:00ean, berriz, Euskadi (Munich, Alemania, 1920) eta Zugastieta (Glasgow, Eskozia, 1888) lurrun tren historikoak aterako dituzte.
Graftonen (1920) lurrun-garabia ere martxan jarriko dute igandean Burdinbidearen Euskal Museoan. Garabi hori Babcock & Wilcox enpresarentzat eraiki zuten, eta lantegi horretan merkataritza zerbitzua eman zuen 1997 urtera arte. Horrez gainera, Azpeitiko museoan U-52 (Bilboko Hiri Tranbia, 1932) eta 218 (Zaragozako Tranbia, 1952) tranbia elektrikoak ere erakutsiko dituzte.
Museoen Egunaren bezperan, larunbatean, lurrun trenaren ohiko irteerak mantenduko dituzte; alegia, 12:00etan eta 17:30ean izango dira horiek.
Museoaren instalazioen ordutegia, berriz, honakoa da:
- Asteartetik ostiralera, 10:00etatik 13:30era eta 15:00etatik 18:30era.
- Larunbatetan, 10:30etik 14:00etara eta 16:00etatik 19:30era.
- Igande eta jaiegunetan (astelehenetan izan ezik): 10:30etik 14:00etara.