Aise gainditu ditu Azpeitiak Gipuzkoako Herriartekoaren eskuzko final-zortzirenak Alegiaren kontra 5 eta 1 eginda. Orain, final-laurdenetan Oiartzun izango du Azpeitiak hurrengo aurkaria; joaneko neurketak etxean jokatuko dituzte Ilunpeko pilotariek, Izarraitz pilotalekuan.
Final-zortzirenetako itzuliko partidak atzo jokatu zituen Azpeitiak Alegiaren kontra, 21:00etan hasita. Hiru mailetako neurketetan nagusi izan ziren Ilunpeko pilotariak. Honakoak izan ziren atzoko emaitzak: kadeteetan, 22 eta 5 irabazi zuten Markel Mendizabalek eta Ioritz Arsuagak E. Garaikoetxearen eta H. Leoren kontra. Gazteen mailan, 22 eta 8 nagusitu ziren Jokin Artetxe eta Mikel Iturralde J. Collado eta O. Garaikoetxearen kontra. Nagusietan, Iker Egigurenek eta Haritz Larrañagak 22 eta 5 irabazi zieten E. Irazustabarrena eta J. Oiarbideri.