Azpeitiko Ilunpe pilota elkarteko ordezkariek galdu egin zuten atzo, ostirala, Gipuzkoako Herriarteko Txapelketaren final laurdenetako joanekoa. Etxean, Izarraitz pilotalekuan, aritu ziren Ilunpekoak, eta 1-2 galdu zuten azken urteetan Herriartekoan txapel bat bestearen atzetik irabazten ari den Oiartzunen aurka.
Kadete mailan, Arsuagak eta Mendizabalek 11-22 galdu zuten; gazte mailan lortu zuen Azpeitiak garaipena, Artetxek eta Sarasuak 22-7 irabazi baitzuten. Aldiz, nagusietan, Oiartzugoek 16-22 menderatu zuten Egiguren-Egiguren bikotea.
Kanporaketa zail jarri zaio Azpeitiari, baina baditu oraindik aukerak aurrera egiteko. Nagusien mailan jokatu zuten partidarik estuena, eta Ilunpekoek lehia horretan ahalegindu beharko dute Oiartzunen puntua lortzen; izan ere, atzo pilatutako tantoetan ez dago alde nabarmenik: Azpeitiak 49 tanto egin zituen, eta Oiartzunek, 51 tanto.
