Zapatu honetan izango da Urrestillako XXI. San Joan Herri Krosa, eta, urtero bezala, adin guztietako herritarrentzako probak prestatu dituzte aurten ere. Hala ere, berrikuntzak izango dira helduen lasterketan, ohi baino laburragoa izango baita: ez ditu 8,8 kilometro izango, 6,6 kilometro baizik. Horrenbestez, ibilbideari hiru itzuli emango dizkiote korrikalariek, aurreko edizioetan baino bat gutxiago.
17:00etan hasiko dira lasterka 0 eta 8 urte bitarteko haurrak, eta haien atzetik lehiatuko dira benjaminak, kimuak eta infantilak. 18:00etatik aurrera, berriz, kadeteen eta jubenilen txanda izango da, eta korrika egiten azkenak izango dira seniorrak.
Urtero San Joan jaiak berotzen dituen lasterketan parte hartzeko izen-ematea irekita dago jubenilen, seniorren eta beteranoen kategoriatan lasterka egingo duten kirolarientzat. Horiek esteka honetan eman ahal izango dute izena. Gainontzekoek, berriz, egunean bertan eman beharko dute izena.
Honako hauek dira XXI. San Joan Herri Krosaren barruko lasterketak, ordutegiak eta ibilbideen distantziak:
- 17:00. 0 eta 8 urte bitartekoak, 200 metro.
- 17:15. Benjaminak (LHko 3. eta 4. mailak), 550 metro.
- 17:30. Alebinak (LHko 5. eta 6. mailak), 950 metro.
- 17:45. Infantilak (DBHko 1. eta 2. mailak), 1.190 metro.
- 18:00. Kadeteak (DBHko 3. eta 4. mailak), 2.300 metro; jubenilak, 4.500 metro; eta seniorrak eta beteranoak, 6.600 metro.