Lehendabiziko aldiz, freestyle modalitateko moto kros ikuskizun bat hartuko du Azpeitiko zezen plazak uztailaren 19an, larunbatez. Espainiako Estatuko hainbat udalerritan jokatzen ari den Europako Koparen barruko proba izango da herrian jokatuko dutena, eta punta-puntako motozaleak ariko dira salto ikusgarriak eta trikimailu konplexuak egiten. "Maila goreneko ekitaldia" izango dela aurreratu zuten antolatzaileek.
Burgosko (Espainia) Gestevent Global enpresak antolatu du ikuskizuna Azpeitiko Udalaren laguntzarekin, eta bateko zein besteko ordezkariek ekitaldia aurkeztu zuten atzo eguerdian zezen plazan. Ion Oteiza udaleko Kirol batzordeburuak azaldu zuenez, dagoeneko sarrera dezente salduta daude (700dik gora atzo arratsaldean; 3.000 lagun ingururentzako edukiera du zezen plazak), eta horrek erakusten du Azpeitiko eta inguruko jendeak baduela halako ikuskizun batekin gozatzeko "ilusioa".
Melody Llamas Gestevent Global enpresako administratzaileak ziurtatu duenez, maila handiko ikuskizuna izango da uztailaren 19an Azpeitiko zezen plazan izango dena; izan ere, sona handiko txapelketetan eskarmentua duten nazioarteko lau moto gidari ariko dira Europako Kopako finalaurrekoetara sailkatzeko borrokan. Honako hauek izango dira, zehazki: hiru aldiz munduko txapeldun izan den Remi Bizouard frantziarra, Diogo Ribeiro portugaldarra eta Rayco Diaz nahiz Dani Martinez espainiarrak.
Remi Bizouard, Diogo Ribeiro, Rayco Diaz eta Dani Martinez pilotuak lehiatuko dira Azpeitian
Proba ikusgarria izango dela ziurtatu du Llamasek, argiaren eta soinuaren efektuek lagunduta hamabost metroko altuerara iristen baitira moto gidarien jauziak eta akrobaziak. Kirol horretan adituak diren pertsonek osatuko duten epaimahai talde bat arduratuko da pilotuen ikuskizuna puntuatzeaz, jauziaren konplexutasunaren, berritasunaren, barietatearen eta altueraren arabera, besteak beste.
Ekitaldia 22:00etan hasiko da, eta ordu eta erdi inguruko iraupena izango du. Lau lehiakideen artean puntu gehien lortzen dituzten bi moto gidariek finala jokatuko dute probaren azken zatian. Irabazleak finalaurrekoetarako txartela lortuko du. Sevillan (Espainia) izango da Europako Kopako finala, azaroaren 29an.
Sarrerak salgai
Ekitaldirako sarrerak joan zen astean jarri zituzten salgai Enterticket.es atarian, eta dagoeneko agortu dira txartelik merkeenak; beraz, aurrerantzean, 25 eurotan salduko dituzte helduen sarrerak eta hamabost eurotan 5-12 urte bitarteko haurrenak. 5 urtetik beherako umeak doan sartu ahal izango dira zezen plazara.
Bestalde, VIP sarrera eskuratzeko aukera ere zabaldu du Gestevent Global enpresak. Horrelakoak erosten dituztenek motozaleek aurreko egunetan egingo dituzten entrenamendu saioak ikusteko aukera ere izango dute. Ekitaldiaren egunean, halaber, ez dute ilaran itxaron beharko zezen plazara sartzeko, eta behean, hondarretan, ikusi ahal izango dute proba. Gainera, motozaleek sinatutako kamiseta jasoko dute horiek. Kasu horretan, 50 euroko kostua izango du helduen sarrerak, eta 30 eurokoa haurrenak.