Ekindar energia kooperatibak ohiko batzar orokorra egingo du datorren astelehenean, eta bazkide guztiak parte hartzera deitu ditu. 17:30ean hasiko da bilera, Soreasu antzokian.
Batzarrean, 2024ko ekitaldi ekonomiko eta soziala aurkeztuko dute kooperatibako kideek, eta azken hilabeteetan bultzatu dituzten proiektuen inguruko xehetasunak emango dituzte. Besteak beste, landareen haztegia eratzeko landaketa eta herrian kargagailu elektrikoak instalatzeko ekimena izango dituzte hizpide. Asteleheneko bileran, gainera, energia-komunitatearen etorkizunari buruzko hausnarketa estrategikoaren prozesua aurkeztuko dute.
Ekindar kooperatibak tokiko energia-eredu berriztagarria eta parte-hartzailea indartzea du helburu eta, ohar batean adierazi duenez, batzar orokorra "funtsezko gunea da egindako bidea partekatzeko eta guztion artean energia hurbilagoa, bidezkoagoa eta iraunkorragoa eraikitzen jarraitzeko". Hori dela eta, Ekindarreko Kontseilu Errektoreak aktiboki parte hartzera gonbidatu ditu bere bazkide guztiak.