Gipuzkoako Foru Aldundiko nahiz Azpeitiko Udaleko ordezkariek harrera egin diete Azpeitian udako hilabeteak pasatzera Gipuzkoara etorri diren Saharako eta Txernobilgo (Ukraina) haurrei nahiz beraien etxeetan hartu dituzten familiei.
Azahara Dominguez Mugikortasun, Turismo eta Lurralde Antolaketako diputatuak, Libe Otegi Turismo departamentuko zuzendariak eta Nagore Alkorta alkateak ongi-etorria eman diete haur ukrainarrei eta sahararrei.
Azpeitiko Trenbidearen Euskal Museoaren instalazioak ezagutzeko aukera izan dute haurrek, eta Azpeitiko eta Lasaoko geltokiak lotzen dituen lurrun trenean ibili dira.