Badator ikasturte berria, eta, horrekin batera, kirola egiten hasteko edo jarraitzeko eskaintza oparoa prestatu du aurten ere Azpeitiko Udalak. Erakunde horrek jakinarazi duenez, irailaren 8tik 12ra bitartean eman beharko da izena saio horietan parte hartzeko.
Helduentzako ikastaroen artean, GAP, total training, TRX, cicling, ciclo/TRX, zumba fitness, pilates, zumba gold, mantentze gimnasia, igeriketa hastapena eta igeriketa teknifikazioa daude. Baigerako bazkideentzako gimnasia eta pilates ikastaroak ere izango dira ikastuste berrian; horrez gain, gazteei begira, total gazte eta TRX gazte ikastaroak antolatu ditu udalak. Era berean, jarduera fisiko eta kirol egokituko ikastaroa ere eskainiko du.
Ikastaro gehienak astean bi egunekoak dira, eta hainbat ordutegitan eskainiko dituzte. 50 minutuko iraupena dute saioek, eta urriaren 1etik ekainaren 26ra izango dira. Izena emateko bi modu daude: igerilekuko harreran edo Azpeitiko Udalaren webgunean. Eskainitako plaza kopurua baino izen emate gehiagoko ikastaroetan, zozketa egingo dute. Irailaren 19an argitaratuko dituzte zozketaren emaitzak, eta, hortik aurrera, plaza libreak dituzten ikastaroetan izena emateko aukera egongo da, iriste hurrenkeran.
Haurrentzako igeriketa ikastaroak
Haurrentzako, berriz, igeriketa ikastaroak antolatu ditu udalak. Hiru hilabeteko iraupena izango dute, eta aurrenekorako izen ematea irailaren 8tik 12ra bitartean izango da, igerilekuko harreran. Hiru adin tartetan banatuko dituzte ikastaroak: 6 hilabete-2 urte; 2-3 urte eta 4-13 urte.
Hurrengo hiruhilekoetarako izen emateak azaroaren 24tik 28ra eta martxoaren 9tik 13ra izango dira. Haurrentzako ikastaroei buruzko xehetasun guztiak igerilekuko harreran eska daitezke.
Ikastaro guztiei buruzko informazio etxez etxe banatuko du udalak datozen egunotan; lotura honetan ikus daiteke informazio guztia. Edozein zalantza izanez gero, 943-81 41 21 zenbakira ere dei daiteke.