Datorren urteko Azkoitia-Azpeitia nazioarteko maratoi erdiaren data ofiziala jakinarazi dute gaur, astelehena, proba horren antolatzaileek: 2026ko martxoaren 28an, larunbatez, jokatuko da Diego Garciaren oroimenezko lasterketa. Kirola eta festa uztartuz Garcia zena omentzea dute xede, beste behin, Xeye atletismo taldeko antolatzaileek.
Izen-emateak azaroaren 1ean irekiko dituztela ere jakinarazi dute. Maratoi erdiaz gain, 8 kilometroko lasterketa motza ere egingo dute aurten ere, parte hartzea herritar gehiagoren artean zabaltzeko asmoz. Proba Gipuzkoako, Euskadiko eta Espainiako Atletismo Federazioaren egutegietan sartu dutela jakinarazi dute probaren antolatzaileek; World Athletics erakundeari eskaera egitea da hurrengo urratsa.
"1994. urtetik, Azkoitia-Azpeitia maratoi erdia euskal atletismoaren erreferente nagusietako bat bihurtu da. Kalitatezko atletismoa eta herri parte hartzea uztartuz, nazioarteko izaera indartzen segitzea da helburua", nabarmendu dute antolatzaileek.