Haurrentzako eta familientzako antzerkian ibilbide luzea duen Patata Tropikala laborategiak Azken eguzkilorea izeneko lana ekarriko du igandean Azpeitira. 17:00etan hasiko da emanaldia Soreasu antzokian, eta sarrera doakoa izango da.
Azken eguzkilorea-k Kattalin izeneko neskatila bat du protagonista. Egun batean, baserritik herrira jaitsiko denean, ohartuko da bere lagun guztiak desagertu direla. Gertatutakoa ulertzeko gogoak eramango du euskal mitologiako hainbat pertsonai ezagutzera: Mari, Basajaun, Tartalo, galtzagorriak, jentilak, eta baita Nokturnoa ere.
Patata Tropikala laborategiaren antzerki honek txotxongiloak, maskarak, antzerkia, umorea eta irudimena nahasten ditu. Gainera, euskal mitologian murgiltzeko aukera ematen die ikusleei, eta gaurkotasun handiko gai bati ere helduko dio zeharka: klima larrialdiari.