Realeko eta Rayo Vallecanoko zale hainbatek omenaldia egin zieten joan zen igandean, bi taldeen arteko partidaren atarian, Juan Paredes Txikiren nahiz Angel Otaegiren zein haiekin batera hil zituzten FRAPeko hiru kideen –Jose Humberto Baena, Jose Luis Sanchez Bravo eta Ramon Garcia Sanz– senideei.
Donostian egin zuten haien oroimen ekitaldia Bultzada eta Bukaneros taldeek, Francoren erregimenak fusilatu zituela 50 urte bete berri direnean; izan ere, joan zen irailaren 27an bete zen haien hilketatik mende erdia. Ekitaldian izan ziren, besteak beste, Txikiren eta Otaegiren familietako ordezkariak, eta zaleen eskutik loreak jaso zituzten.