Ertzaintzak, Kataluniako Mossos d'Esquadra polizia taldearekin elkarlanean, hiru gizon atxilotu zituen hilaren hasieran Donostian, hainbat etxebizitzatan lapurretak egitea egotzita. Hain zuzen ere, Ertzaintzak adierazi duenez, Donostian, Zarautzen eta Azpeitian etxebizitza banatan lapurreta egitea egotzita atxilotu zituzten talde kriminal bateko hiru kideak.
Ertzaintzaren arabera, Kataluniako poliziak jakinarazi zion hiru gizonak Euskal Herrian zirela. Haien gaineko ikerketa eginda, Donostiako Aiete auzoko etxebizitza batetik ateratzen ari zirela atxilotu zituen Ertzaintzak. Poliziak ohar bidez azaldu duenez, dirua, bitxiak, guanteak, erremintak eta lapurretarako erabiltzen zituzten hainbat objektu atzeman zizkieten.
Atxilotutako gizonek 27 eta 40 urte bitartean dituzte, eta epailearen esku daude. Ertzaintzak, berriz, lapurreten gaineko ikerketarekin segitzen du.