Azpeitiko Euskotrenen Burdinbidearen Euskal Museoan lurrun trenen bi bidaia eskainiko dituzte asteburu honetan, aurtengo sasoiko azkenengoak. Zapatuan nahiz igandean, trenak 12:00etan abiatuko dira museoaren geltokitik, eta ohi bezala, Lasaora arteko joan-etorria egingo dute. Trenerako txartelak museoan bertan erosi beharko dira.
Azpeitian dagoen Burdinbidearen Euskal Museoak bere instalazioetan Europako tren bildumarik onenetakoa biltzen du, eta mota guztietako ibilgailuak ditu erakusgai: lurrun tren makinak, dieselak eta elektrikoak, automotoreak eta bagoiak. Gainera, Urolako trenbidearen tailer mekaniko zaharrari esker, makina-erreminta multzo osatua du, baita XIX. mendearen amaieratik trenbidean erabilitako uniformeen eta munduko tren erlojuen bildumarik onenetako baten laginak ere.
Burdinbidearen museoak honako ordutegia du: astelehenetan itxita egoten da, eta asteartetik ostiralera, 10:00etatik 13:30era eta 15:00etatik 18:30era zabaltzen dute. Larunbatetan ere goiz eta arratsalde izaten da zabalik museoa, 10:30etik 14:00etara eta 16:00etatik 19:30era. Igandeetan eta jaiegunetan 10:30etik 14:00etara izaten da irekita. Museoko telefono zenbakia 943-15 06 77 da eta helbide elektronikoa museoa@euskotren.eus.