Hator Hator Horror Fest jaialdiaren bosgarren edizioa izango da asteburuan. Aurtengoan ere, beldurrezko film laburren lehiaketa ez ezik, kontzertuak nahiz umeentzako ekintzak izango dira aukeran. Hitzordu guztiak doakoak izango dira.
Zapatuan, esaterako, Umeen Hatorfesta egingo dute. 12:00etatik 14:30era, magia tailerra, magia emanaldia eta makillaje txokoa izango dira Azoka Plazan. Iluntzean, berriz, kontzertuen txanda izango da. Hiru metal taldek eskainiko dituzte emanaldiak 20:30etik aurrera, Sanagustin kulturgunean: Iruñeko Diabulus In Musica, Donostiako Ancient Settlers eta Madrilgo Absenci. Talde horietako abeslariak emakumeak dira, eta muturreko metal doinuak, pasarte sinfonikoak nahiz modernoak uztartuko dituzte kontzertuetan.
Igandean, berriz, zinemazaleentzako hitzordua izango da. Izan ere, nazioarteko beldurreko film laburren emanaldia egingo dute 18:00etan hasita. Orain arteko edizioetako filmen emanaldia Soreasu antzokian egin badute ere, aurtengoan Sanagustin kulturgunean gauzatuko dute.