Azpeitiko Udalak, Euskararen Mahaiak eta Euskaltegiak abenduaren 3aren, Euskararen Nazioarteko Egunaren, bueltan hainbat aurkezpen solasaldiak, ikus-entzunezkoen emanaldiak, hitzaldiak Hizkuntzen Ginkana lehiaketa eta abenduaren 27rako Bilbon Euskalgintzaren Kontseiluak antolatu duen Euskaraz bizitzeko Pizkundea emanaldirako autobusa antolatu dituzte. Datorren asteartean, abenduaren 2an, abenduko ohiko udalbatzarra egingo dute udalean, eta bertan Euskararen Egunari lotuta adostu duten adierazpenaren berri emango eta bozkatuko dute udal hautetsiek.
"Euskararen Eguna egunero izatea da erronka", adierazi du Aitor Larrañaga Azpeitiko Udaleko batzordeburuak. "Etorkizunean ere, euskararen arnasgune izatea nahi dugu Azpeitia eta euskaraz bizitzen jarraitzea", erantsi du zinegotziak. Euskararen Eguna hausnarketarako izatea nahi dutela nabarmendu du Larrañagak: "Gertatzen ari diren hainbat faktorek eragin zuzena dute gure hizkuntza portaeretan, eta horiei buruz hausnartzea nahi dugu Euskararen Egunaren harira antolatuko ditugun jardueretan".
Euskararen Egunean eta ondorengo egunetan egingo dituzte jarduerak. Tartean, bi aurkezpen-solasaldi izango dira. Aurrenekoa, abenduaren 3an, asteazkenean izango da, 18:30ean, Basazabal jauregian. Lehenengo, Pantailak Euskaraz taldeak egindako Urak eginen du bide dokumentala ikusteko aukera izango da. Ordu erdi inguruko dokumental horretan, adituen eta pertsona ezagunen elkarrizketa eta testigantzen bidez, gaur egun euskarak ikus-entzunezkoen munduan duen egoera aztertzen du. Segidan, gaiari buruz hitz egiteko aukera izango da Pantailak Euskaraz-eko Ioritz Gonzalezekin.
Abenduaren 10ean, 18:30ean hasita, Basazabalen izango da bigarren aurkezpen-hitzaldia. Esnatu ala Hil liburua aurkeztuko du Garikoitz Goikoetxeak. Iñaki Iurrebasorekin batera idatzi du, eta euskararen indarberritzeak bizi duen geldialdia aztertu dute liburuan. "Helduleku izan nahi du liburu honek, euskararen bilakaera eta egoera zein den ohartzeko tresna. Begiak zabaltzeko ordua da, izan ere. Euskararen biharko ametsak esnatzea eskatzen baitu gaur", dio liburuaren laburpenak.
Enpresetan eta Euskaltegian
Lan munduan euskara sustatzeko, Elegune zerbitzua eskaintzen du Azpeitiko Udalak herriko hainbat lantokitan. Zerbitzu hori erabiltzen duten enpresetako langileen artean Hizkuntzen Ginkana lehiaketa egiten dute. Aurten, zazpi enpresak parte hartu dute. Haiei, galdera bana bidali zaie astero urrian eta azaroan. Abenduaren 3an banatuko dute saria, eta lehiaketaren saridunek lan egiten duten enpresara udal ordezkariak bertaratuko dira saria ematera.
Euskaltegiko ikasleak ere bideo bat prestatzen ari dira, eta Euskararen Egunean, abenduaren 3an, argitaratuko dute.
Euskararen Mahaiak sustatuko bideo esketxei beste bultzada bat emango zaie. Aurten, bi ekinalditan, zortzi esketx argitaratu ditu Euskararen Mahaiak, eguneroko egoeretan sortzen diren hizkuntza portaerak erakutsiz, umore ukituz, azpeitiarren hizkuntza portaerei buruz hausnartzeko eta aldaketa eragiteko. Bideoek zabalpen handia izan dute, eta orain beste bultzada bat emango zaie, Gukaren laguntzarekin. Horrenbestez, hamabost egunez, Guka telebistan emango dituzte bideoak, eta Gukaren webgunean ere, banner baten bidez, lotura egongo da bideo horietara.
Bilboko Pizkundea emanaldirako autobusa
Euskalgintzaren Kontseiluak antolatuta abenduaren 27an, larunbata, Bilbao Arenan, 17:00etan hasita, Pizkundea emanaldia izango da, Euskaraz bizitzeko Pizkundea lelopean, hainbat kulturgilek, sortzailek eta musikagilek parte hartuz. Hara joateko Azpeititik autobusa jarriko da, 15:30ean anbulatorio aurretik irtenda. Honako kulturgile hauek parte hartuko dute Pizkundea emanaldian: Amets Aranguren, Gorka Urbizu, Anari, Joseba Tapia, Julen Goldarazena Flako Fonki, Maia Iribarne, Miren Narbaiza, Edurne Azkarate, Itziar Ituño, Miren Gaztañaga, Ramon Agirre, Ane Labaka, Sustrai Colina…
Emanaldirako eta autobuserako sarrerak astelehenetik, abenduaren 1etik, aurrera egongo dira salgai Sanagustin kulturgunean, 20 euroan (sarrera eta autobusa daude prezioaren barruan).