Haurrentzako ekintzekin hasi dute Hator Hator Horror Festen bosgarren aldia. Gaur eta bihar artean egingo dituzte aurtengo urterako ondu duten egitarauaren barruko ekintzak. Eguerdian, esaterako, Umeen Hatorfesta egin dute Azoka Plazan. 12:00etatik 14:30era bitartean, magia tailerra, magia emanaldia eta makillaje txokoa izan dituzte aukeran haurrek, eta gozatu dute hara hurbildu direnek.
Iluntzean, berriz, kontzertuen txanda izango da. Hiru metal taldek eskainiko dituzte emanaldiak 20:30etik aurrera, Sanagustin kulturgunean: Iruñeko Diabulus In Musica, Donostiako Ancient Settlers eta Madrilgo Absenci. Talde horietako abeslariak emakumeak dira, eta muturreko metal doinuak, pasarte sinfonikoak nahiz modernoak uztartuko dituzte kontzertuetan.
Bihar, berriz, zinemazaleentzako hitzordua izango da Sanagustin kulturgunean. Izan ere, nazioarteko beldurreko film laburren emanaldia egingo dute 18:00etan hasita.