San Eloi festetan murgilduta dira Azpeitiko Landeta auzoan. Ostegunean egin zuten jaietako lehen ekintza, mus txapelketa, eta atzo, berriz, bertso afaria izan zen, Mendizabal erretegian. Gaur, larunbata, izanik, egitarau betea dute prestatuta, eta egun osoan zehar izango dira ekintzak.
Eguerdian, herri kirol saioarekin murgildu dira jai giroan Landetan. Harri jasotzaileen erakustaldiarekin ekin diote saioari. Gaurkoan, gainera, izan da denen ahotan ibili den albiste bat. Irati Osinalde harri jasotzaile gaztea estreinakoz aritu da jendaurrean, eta sekulako txalo zaparrada jaso du hark. Harez gain, Olaia Esnaola, Xabier Aranburu Guzta eta Jon Unanue Goenatxo III.a aritu dira harria jasotzen. Era berean, Julen Alberdia Txikia IV.a eta Mikel Larrañaga aritu dira aizkorarekin. Herri kirol saioaz gain, trikipoteoa eta auzo bazkaria egin dituzte eguerdian Landetan, eta iluntzean, txerri boda izango da.
Astelehenean, San Eloi
Astelehenean izango da jaietako egun handia, San Eloi eguna, eta asteguna izanagatik, auzo bazkariarekin ospatuko dute auzoko festen zaindariaren eguna: Bordatxo tabernan egingo dute arkume jana.
Festa egun bat gehiago izango dute, halaber, aurtengo jaiek: abenduaren 6rako, zapaturako, egun osoko egitaraua prestatu dute auzotarrek. Egun horretan animaliak ere izango dira protagonista, erakundeek jarritako debekua bertan behera gelditu baita. Izan ere, orain arte indarrean izan da ganadu azokak egiteko debekua, dermatosi nodularraren kutsatzeak saihesteko, baina astelehenetik aurrera debeku hori kendu egingo dute Eusko Jaurlaritzak eta Nafarroako Gobernuak.
Besteren artean, animalien erakusketa, ponien gainean ibilaldiak nahiz sokamuturra egingo dituzte. Horrez gain, Iagomagoren erakustaldia nahiz bazkaria ere prestatu dituzte abenduaren 6rako.
Hona hemen Landetako festetako egitaraua:
Gaur, larunbata
- 21:30. Txerri boda, Landeta sagardotegian.
Abenduaren 1a, astelehena, San Eloi eguna
- 14:30. San Eloi eguneko arkume jana, Bordatxo tabernan.
Abenduaren 6a, zapatua
- 12:00. Azoka eta animalien erakusketa.
- 12:00. Pintxoak eta sagardoa dastatzeko aukera izango da.
- 13:00. Poniekin ibilaldiak, Lopene ganadutegiaren eskutik.
- 13:30. Iagomagoren erakustaldia.
- Segidan, orgaren bigarren zozketa.
- 14:30. Bazkaria, Lau Bide jatetxean.
- 16:30. Sokamuturra, Albara ganadutegiaren eskutik.