Aurtengo Joxe Takolo bekari esker Kirgizistango mendietan barrena egindako espedizioaren gaineko azalpenak eman zituzten atzo Imanol Murok eta Mikel Txintxurretak Mendietxe museoan. Proiekzio-solasaldia tarteko, herritar ugari izan ziren Lagun Onak mendi bazkunak antolatutako udazkeneko Mendi Asteko lehen hitzorduan.
Gaur Egoitz Arrutiren txanda izango da. Hark Basografia, basoari begirada ikus-entzunekoa eramango du Mendietxera. 19:00etan hasiko da emanaldia, eta doakoa izango da.
Hirugarren eta azken hitzordua, berriz, bihar izango da: Carlos Soria espainiar mendigoizale beteranoak Manaslu 86 urterekin izenburupean eskainiko du solasaldia. Sorasu antzokian izango da hitzaldia, 19:00etan hasita.
Mendi Asteko hiru hitzordu horien ostean, ostiralean, urteko batzarra egingo du Lagun Onak mendi bazkunak. Mendietxen egingo dute bilkura, 19:00etan hasita. Batzarraren ostean afaria egingo dute Mendizaliek jatetxean, eta otordura joan nahi dutenek aurrez izena eman beharko dute.