Euskotrenen Azpeitiko Burdinbidearen Euskal Museoa itxita egongo da abenduaren 22tik urtarrilaren 6ra bitartean, oporrak tarteko. Aurtengo denboraldiaren azkeneko eguna igandea, hilaren 21a, izango du museoak, eta 10:30etik 14:00etara izango da irekita.
Burdinbidearen museoak urtarrilaren 7an (asteazkena) hasiko du denboraldi berria, eta honako ordutegia izango du: asteartetik larunbatera, 10:00etatik 13:30era eta 15:00etatik 18:30era; igande eta jaiegunetan (astelehenetan izan ezik), 10:30etik 14:00etara.
Azpeitiko museoan trenbideekin lotutako Europako bildumarik onenetakoa ikus daiteke, baita era askotako ibilgailuak ere: lurrun trenak, tren dieselak eta elektrikoak, automotorrak eta askotariko bagoiak. Horrez gain, Araba, Bizkaia eta Gipuzkoako makina-erremintako bildumarik osatuenetako bat du museoak, garai bateko Urolako trenbidearen tailer mekanikoari esker. XIX. mendearen bukaeratik gaur egunera arteko treneko uniformeak ere ikusgai daude, baita munduko tren-erlojuen bildumarik onenetakoa ere.