Itaiak jakinarazi duenez, 2025ean gutxienez 40 eraso matxista salatu dituzte Azpeitian, eta "balantze gordin" horri erantzuteko "kale bira" deitu du etzirako, asteazkena, Erasotzaileen inpunitateari ez! lelopean. 18:30ean abiatuko da mobilizazioa, plazatik.
Pasa den asteko asteazkenekoa izan zen azken eraso matxista. 22:52ak aldera, gizonezko batek, buru-berokia jantzita zuela, lurrera bota zuen GI-631 errepidearen ondoan oinez zihoan 49 urteko emakume bat, Azkoitia eta Azpeitia artean. Sexu askatasunaren aurkako delitua egotzita, epaileak espetxera bidali zuen gizona.