Urte berria iragartzeko gauerdiko kanpai hotsak entzun bezain pronto, suziriak botatzeko ohitura du zenbaitek, baina halakorik ez egiteko eskatu die Azpeitiko Udalak herritarrei. "Zenbait herritan ezbeharrak larriak gertatu izan dira suzirien eraginez", azaldu du erakundeak.
Udalak herritarrei gogorarazi die herriko zenbait etxek egurrezko egitura dutela, eta suzko jaurtigai horiek sute arriskuak sor ditzaketela, baita bestelako zenbait kalte eragin ere. Era berean, erakundeak nabarmendu du suzirien zarata "oso desatsegina" izaten dela zaratarekiko hipersentikortasuna duten herritarrentzat eta animalientzat.