Gazte Koordinadora Sozialistak (GKS) faxismoaren eta estatuen autoritarismoaren aurkako manifestazioak egingo ditu urtarrilaren 31n, gazteen artean faxismoaren aurkako kontzientzia zabaltzeko asmoz. Bilbon eta Iruñean izango dira manifestazioak, eta Urola Erdiko GKS Bilbora joateko deia zabaltzeko asmoz, aurkezpenak egiten hasi da Urola Erdian. Atzo, ostirala, Azpeitiko Azoka Plazako areto nagusian egin zuten aurkezpena, eta jendetza bildu zen.
"Ideia erreakzionarioei, estatuen erreforma autoritarioari eta hedatzen ari den faxismoari aurre" egin asmoz deitu du GKSk manifestazioa hil honen azken egunerako. "Euskal Herrian faxismoari gauzak erraz utziko ez dizkion indar handi bat dagoela erakutsi behar dugu, eta horretarako, garrantzitsua da ahalik eta gazte langile gehien mobilizatzea", adierazi dute GKSko kideek.
Bilboko manifestaziora joateko, gainera, autobusa antolatu dute Urola Erditik. Azpeitiko Haginpe tabernan, Azkoitiko Dean nahiz Tta-kun tabernetan eta Zestoako Fati tabernan eros daitezke autobuserako txartelak.