Txikitan oso danborrada zalea ez nintzen arren, beti parte hartu izan dut festan modu batera edo bestera. Adibidez, urtero-urtero ikastolan egiten diren danborradetan parte hartu izan dut.
Plaza beteta ikustean piztu zitzaidan danborradarekiko ilusioa
Kaleko haurren danborradan 7 urterekin izan nuen lehendabizikoz irteteko aukera. Gastadoreen taldean irten nintzen urte hartako San Sebastian eguneko danborradan. Gainera, banderadun gisa irten nintzen eta udaletxeko balkoitik astindu nuen bandera, plaza herritarrez beteta zegoen bitartean. Orduan piztu zitzaidan danborradarekiko ilusioa. Izan ere, han goitik azpeitiarrak danborra jotzen ikusteak asko emozionatu ninduen.
Aurten lehen aldiz kaleko haurren danborradan danbor jotzaile izango naiz, Izarraizpeko napoleoi gorrien taldean. Eguna iristeko pozez nago; ilusio handiarekin eta gogoz joko dut danborra.
San Sebastian eguna polita da niretzat, eta ziur nago ederki ibiliko naizela danbor festan familiarekin eta lagunekin batera.