Euskadiko Automobilismo Federazioak 2025. urtean jokatutako euskal txapelketetako sariak banatu ditu gaur igandea, Azkoitiko Baztartxo antzokian. Sari banaketa ekitaldian, denera 120 garaikur baino gehiago banatu dituzte. Horietatik hamar garaikur jaso dituzte Azpeitiko gidari eta kopilotuek.
Besteak beste, autokros txapelketako, slalomeko, erregulartasuneko, rallysprinteko, lur gaineko rallyetako, mendiko probetako, 206 Kopako, rallyetako eta Pirelli kopako sariak eman dituzte Baztartxon egin duten sari banaketa ekitaldian.
Azpeitiko gidari nahiz kopilotuek lortu dituzten sariak honakoak izan dira: autokroseko txapelketari lotuta, Jesus Etxeberriak bigarren sailkatuaren saria jaso du II. mailan. Rallysprint txapelketako seigarren mailako lehen sailkatuaren garaikurra Mikel Labaka kopilotuak eskuratu du. Formula librean, Aratz Buldainek bigarren sailkatuaren garaikurra jaso du, eta hirugarren sailkatuarena Enaitz Etxeberria urrestildarrak. Lur gaineko rallyen txapelketako hiru garaikur jaso ditu gaur Gorka del Cid gidariak, gidarien artean bigarren sailkatuarena nahiz junior mailako eta lehen mailako txapeldunarenak. 2025eko rally txapelketako bigarren mailako kopilotu txapeldunarena jaso du Maria Aranberri nuarbetarrak. Nazioarteko sarien barruan, berriz, Igor Agirrebeñak autokros-Ceax txapelketako seigarren sailkatuaren garaikurra eskuratu du eta Iosu Alberdik Kroskar RX saileko laugarrenaren saria.