Ezker Hormako Kluben Arteko Gipuzkoako Txapelketaren finaletako bat hartu du gaur goizean Betharrameko pilotalekuak. Hain zuzen ere, larruzko paleta modalitatearen kadete mailako binakako txapelak zeuden jokoan Betharramen, eta etxeko bi bikote, horiek janzteko lehian: Ilunperen erreminta saileko Urritz Goenaga eta Telmo Martin (Ilunpe 2), eta Telmo Garaizar eta Mikel Gurrutxaga (Ilunpe 1).
Final estua jokatu dute Ilunpeko palista gazteek, eta Garaizarrek eta Gurrutxagak irabazi dute, 30-27. Finala bukatuta, Ilunpeko erreminta saileko Oier Alkortaren eta Mikel Sanchezen eskutik jaso dituzte garaikurrak finalistek, harmailetan elkartu direnen txalo artean.