Azpeitiko kiroldegia bor-borka egon da asteburuan, gimnastika erritmikoko kimu eta infantil mailetako Gipuzkoako Txapelketaren bigarren fasearekin. Zapatu arratsaldean kimuek eta igande goiz-eguerdian infantilek, dozenaka gimnastek bete zuten kiroldegiko kantxa, eta haien etxekoek, berriz, harmailak.
Maiatzaren 9an jokatuko diren finaletarako txartelak banatu dituzte asteburuan kiroldegian; lehen eta bigarren faseko emaitzen baturarekin erabaki dituzte finalistak. Zapatuan, finalaren atarian gelditu ziren Azpeitiko ordezkariak: hamahirugarren tokian sailkatu ziren, herenegungo lehian zein sailkapen orokorrean, eta lehen hamabi taldeentzako tokia zegoen finalerako. Infantiletan, aldiz, Loretokiko taldea seigarrena izan da –atzo zein bi faseak batuta– eta, horrenbestez, Gipuzkoako Txapelketaren finalean lehiatuko da. Baita Maren Bikendi ere: banakako finalean ariko da azpeitiarra, atzo zein bi faseen ondoren bosgarren tokian sailkatuta.
Datorren asteburuan Loretokiko kadeteak lehiatuko dira Gipuzkoako Txapelketan, Tolosan.
(Argazkiak: Mailo Oiarzabal eta Loretoki)