Datorren zapatuan iritsiko da 24. Korrika Azpeitira, arratsaldez. Ordea, azken urteetako moldeei eutsiz, Azpeitiko Udalak Hazparnen (Lapurdi) hartu du Korrikako lekukoa. Hazparne-Azpeitia komiteak, Hazparneko Herriko Etxeak eta Azpeitiko Udalak elkarrekin hartu zuten lekukoa 24. Korrika hasi zen egun berean, ostegunean.
Azken aldietan bezala, udalak Azpeitiarekin senidetutako herrian ere bat egin zuten euskararen aldeko egitasmoarekin. 23:00 iritsi baino lehen, 74. kilometro zatian hartu zuten lekukoa udala ordezkatuz Hazparnen izan ziren Leire Goenaga, Mikel Odriozola nahiz Aitor Larrañaga zinegotziek eta gainerako eragileek. Atharratzetik (Zuberoa) Bilbora, hamar egunez, eskuz esku eramango dute lekukoa Euskal Herri luze-zabaleko herritarrek.