Ene Kantak taldeak Bisonte mastodontearen bila ikuskizuna eskainiko du maiatzaren 31n, 17:00etan, Soreasu antzokian. Bi urtetik gorakoentzako euskarazko haur antzerki hori ikusteko sarrerak eskuragai jarri dituzte Kulturaz.eus webgunean.
Bisonte mastondotearen bila ikuskizunaren azken emanaldia izango da Azpeitikoa, eta aurretik antzezlanak herriz herri izandako arrakasta nabarmendu du Ene Kantakek: "Azken hamalau hilabeteetan 40 emanaldi baino gehiago eskaini ditugu eta 30.000 sarreratik gora saldu, eta bira maiatza bukaeran itxiko dugu Azpeitian".
Nerea Urbizuk idatzitako izen berbereko liburuan oinarritutako haur antzerkia da Bisonte mastodontearen bila, eta musikak garrantzia handia du. Beraz, antzerkiaz gainera, musikaz eta kantuez gozatzeko aukera izango dute emanaldira doazenek.
Ikuskizunean historiaurrera egin du jauzia Ene Kantak-ek: "Geure ingurua, geografia eta eskaintzen dizkigun baliabideak ezagutarazteko eta natura zaintzen eta errespetatzen ikasteko asmoarekin egin dugu lehen gizakiaren garaira saltoa". Besteak beste, ingurumena, taldelana, sormena eta genero berdintasuna landu dituzte maiatzaren 31n Azpeitiko Soreasun eskainiko duten antzezlanean.