Reala eta Atletico Madril parez pare Sevillako Cartuja estadioan. Tentsioa eta urduritasuna nagusi. Arauzko denbora amaitu da, eta markagailuan emaitza: 2-2. Luzapenean golik ez, eta penaltietara.
Penaltietan irabazi du Pellegrino Matarazzok zuzendutako Realak Espainiako Kopako finala Atletico Madrilen aurka, eta lehertu da festa. Unai Marrero atezain azpeitiarrak balentria galanta egin du, eta finaleko protagonista bihurtu da, erabakigarria izan baita emaitzan, penaltien txandan bi jaurtiketa geratuta. Jokalari onenaren saria ere jaso du. "Marrero, Marrero" diote zale txuri-urdinen oihuek Cartujan, baita zaleen gunean ere. Sevillan bakarrik ez, Azpeitiko Sanagustin kulturgunean elkartutako ehunka herritarrek ere azpeitiarraren izena oihukatu dute denbora luzez, partida amaitu berritan.
Azpeitia Sevillara begira jarri da bart. Jendez lepo bete da Sanagustin Realaren eta Atletico Madrilen aurkako neurketa ikusteko, eta tentsio une luzeak igaro ostean, jai giroan amaitu da hitzordua. Kulturgunean ez ezik, herriko hamaika elkarte eta txokotan jarraitu dute Realaren partida, eta suziriak jaurti dituzte finala amaitu bezain pronto.
Txapeldunak Azpeitia hartu du gogoan
Loiolako atezaina hunkituta eta oso pozik mintzatu da finala amaitu berritan, eta horrenbeste maite duen Azpeitia ekarri du gogora EITBri emandako adierazpenetan. Finala irabazita, haren "ametsa egi bihurtu" dela aitortu du. Hainbatetan une txarrak pasatu izan dituen arren, "egindako lanaz harro" dagoela aitortu du Loiolakoak, eta merezi izan duela. Besarkada bat bidali du Azpeitira, eta gogoan izan ditu herria, familia eta lagunak: "Azpeitiarra naiz ni, Loiolakoa. Asko maite dut nire herria, nire lagunak, nire familia ; Azpeitiak dena eman dit. Besarkada handi bat Azpeitiko herriari".
Prentsa agerraldian, Euskadi Irratiko Txetxu Urbieta kazetari azpeitiarrak galdetu dio ea nola sentitzen den "loiolatar bat realzaleen heroi" bihurtuta, eta Marrerok adierazi du oraindik gertatutakoa sinetsi ezinda dagoela. "Hau ikaragarria da", erantzun du. "Txikitatik amestu dudan zerbait da; realzalea naiz, azpeitiarra, Loiolakoa, realzalea txiki-txikitatik". Lortutakoarekin oso pozik dagoela adierazi du, eta are gehiago realzaleak zoriontsu egiteagatik. Sevillara joandako azpeitiar eta zaleak ere hartu ditu gogoan, lagunak batez ere, eta haiengandik jasotako babesa eskertu du hunkituta.
⭐️ Babestu gaituen 𝗜𝗭𝗔𝗥𝗥𝗔
— Real Sociedad Fútbol (@RealSociedadEUS) April 19, 2026
Izugarria, Marre. pic.twitter.com/ieNbFgC2In
Agirrezabalagarena ere bada garaipena
Realaren gizonezkoen taldeak historian irabazi duen laugarren Espainiako Kopa da atzokoa: aurrez, 1909an, 1987an eta 2021ean zuen lortua.
Asteburuan Sevillan izan diren eskualdeko zenbait realzaleri egindako elkarrizketekin zein hango giroarekin osatutako bideoa argitaratuko du gaur Gukak.