Esan polizia sindikatuak inpugnazio formala aurkeztu du Azpeitiko Udaltzaingoaren egungo udaltzainburuaren izendapenaren aurka. Sindikatuaren arabera, udalak udaltzainburua izendatzeko jarraitutako prozedura "irregulartasunez betea" litzateke. "Ez gaude akats administratibo soil baten aurrean, klientelismo instituzionalaren balizko kasu baten aurrean baizik", azaldu du sindikatuak.
Inpugnazioaren argudioak honako honetan oinarritzen dira: kargurako izendatutako pertsonak ez lituzke deialdiko oinarrietan eskatutako funtsezko baldintzak beteko. Egoera hori "larriagoa" litzateke sindikatuaren arabera, antzeko egoeran zeuden beste agente batzuk ezin izan zutelako beren burua aurkeztu baldintza guztiak betetzen ez zituztelako; hala ere, "udalak baimena eman zuen, baldintzak betetzen ez zituen pertsona bat kontratatzeko eta udaltzainburu kargurako izendatzeko". Esanen arabera, "justifikaziorik gabeko tratu desberdinduaren zantzu larria" da hori.
Lanpostuen Zerrendaren gainean egindako kudeaketa ere salatu du sindikatuak. Dioenez, 2020tik 2025era bitartean –biak barne–, udaltzainburu postua hutsik egon zen ofizialki. Hala ere, 2026an Lanpostuen Zerrendan aldaketa bat egin zuten, baina ez zuten eman aldaketa horren azalpenik. Sindikatuaren ustez, jokabide horrek "oso irudi kezkagarria ematen du". Gogorarazi du behin eta berriz eskatu dutela hutsik dagoen plazaren ohiko deialdia, "udalaren aldetik behar adinako erantzunik jaso gabe".
“Azpeitiko Udalak ezin du beste alde batera begiratu. Irregulartasun eta faborezko tratuaren zantzu hain argiak daudenean, erakundeen betebeharra ikertzea, argitzea eta erantzukizunak bere gain hartzea da”, dio sindikatuak. Hori horrela, udalari eskatu dio udaltzainburu postuan dagoenaren funtzioak "berehala" eten ditzala, badaezpada, prozedura ebatzi bitartean "hirugarrenei kalterik ez eragiteko eta udalaren jardueraren segurtasun juridikoa zaintzeko".
Udalaren erantzuna
Azpeitiko Udalak erantzun egin dio sindikatuari adieraziz Azpeitiko Udaltzaingoaren udaltzainburu postuaren izendapena "indarrean dagoen araudia eta ezarritako prozedura guztiak jarraituz" egin zela.
Azaldu duenez, alkatetzak 2021eko martxoaren 18an emandako ebazpen bidez onartu ziren postua izendapen askez hornitzeko deialdia eta oinarriak. "Erabaki hori behar bezala argitaratu zen Udalaren webgunean, Gipuzkoako Aldizkari Ofizialean eta Euskal Herriko Agintaritzaren Aldizkarian. Prozesu osoa dagokion espediente administratiboaren, txosten juridikoen eta indarreko araudiaren arabera garatu zen".
Bestalde, azaldu du 2026ko maiatzean egindako Lanpostuen Zerrendaren aldaketak ez duela egoera berri bat sortzen, baizik eta amaituta eta indarrean dagoen prozedura baten ondorioak jasotzen dituela, ordura arte eguneratu gabe zegoen errealitate administratiboa islatuz.
"Udalak berretsi nahi du administrazio jarduera gardentasunez eta legezkotasun osoz gauzatu dela", gaineratu du.