Kultur Aniztasunaren Nazioarteko Eguna izan zen atzo, eta data horren bueltan Aniztasun Festa egin dute arratsaldean plazan, "herritarren arteko elkar ezagutza sustatzeko, kulturarteko harremanak indartzeko eta aniztasunari balioa emateko".
Azpeitiko Udaleko Aniztasun eta Bizikidetza Mahaiak antolatuta, Venezuela, Sahara, Senegal, Mali, Nigeria eta Hondurasko ordezkariek parte hartu dute egitasmoan, baita zenbait gobernuz kanpoko erakundek eta herriko elkartek ere. Elkartu direnek haien herrialdeetako produktuak, janariak, ohiturak eta kultur adierazpenak partekatu dituzte festa giroan.
Horrez gain, haurrentzako txoko bat ere egokitu dute, eta han margotzeko nahiz umeen munduko askotariko jolasak ezagutzeko aukera izan dute bertaratu direnek.